CARTEL N.º 15. COIDADE AS PEQUENAS FERIDAS 1941

O cartel do ano 1941 volve apostar por unha mensaxe que non deixa nada á imaxinación. Sobre as palabras “Coidade as pequenas feridas” vemos un primeiro plano dun pé con calzado de esparto a piques de pisar un cravo, e en segundo plano, un varón con xesto desolado ao que amputaron unha perna. Na década dos corenta, unha época de grandes carestías, fame e necesidades, a imaxe deste cartel arrepía porque os traballadores non tiñan moitas opcións á hora de elixir a súa vestimenta e a forma de protexerse.